Friday, July 19, 2024

వ ర్ష సం ధ్య

ఎనుముల మంద లేటి కెదురీదెను; నీటను జొచ్చి పట్టు త

ప్పినదొక ఎడ్లబండి శరవేగముతో కెరటాలు పొంగినన్;

కనవలె పిట్టలన్ పొదల కమ్మగ పాడుచు గాలి కూగుచున్;

క్షణమున వాగు దాటి జతగా దవులేగుచు రివ్వురివ్వునన్!

ఏమీ దీనధరిత్రిపై కరుణ పెన్నేటిన్ కటాక్షించెనే!

ద్యోమార్గాల తమో విభావరుల విద్యున్మేఘ సంఘాతముల్;

ప్రేమాధీశు ప్రచండమేఘ పతనోద్వేగంబు శాంతించి  వి

శ్రామంబొందు మహీధరాన జలధారాపాత సంగీతముల్!

మౌనముగా దిగంతముల మబ్బులు మూగి, దివాకరుండు ని

ర్వాణము నొందు పర్వత కవాటముపై పరదాలు వైచె; ఝం

ఝానిల మొండు తాకి, తెర సందులలో చిరురేక ప్రాకి, ని

ద్రాణ తృణాళి సోకి, అపరంజి వెలుంగుల సాంధ్యశోభలన్!

అపుడు పెళా పెళా రవము లంబరవీధి శతఘ్ని మ్రోతలై;

అపుడు పొలాలు వీడి విపినాంతము వైపు బకాళి భీతితోన్;

అపుడు ప్రదోష దీప వరదాభయ కాంతులు వాడవాడలం;

దపుడు దివావిషాద చరమాంక తమోహత శక్రచాపమున్!

చెదిరి, మహాప్రవాహ ఘటశేషము వోలె, దినాస్త రాగ మ

య్యది పెనుశూన్యమై పొడమి, ఆంధ్య విభీషణ వార్షుకాభ్రముల్

పదము, పదమ్మునందుఱిమి, పన్నగ దంష్ట్రల భేకగాత్రముల్

చిదిమి, పదేపదే మిసిమి, చిక్కని నీలి మొగిళ్ళలో సుమీ!

నివర్తి మోహన్ కుమార్

Also read: లోక బాంధవా!

Also read: ఎవరు?

Also read: చెఱువు

Mohan Kumar Nivarti
Mohan Kumar Nivarti
నివర్తి మోహన్ కుమార్. జననం 26 ఆగస్టు 1950, నంద్యాల. వృత్తి రీత్యా ఛార్టర్డ్ అకౌంటెంట్. హైదరాబాదులో ప్రాక్టీసు. కవిత్వం, చిత్రలేఖనం, సాహిత్య విమర్శ, జ్యోతిష్యం, చరిత్ర, సామాజిక రాజకీయ శాస్త్రాల్లో ఆసక్తి. మొబైల్ : 96038 27827

Related Articles

LEAVE A REPLY

Please enter your comment!
Please enter your name here

Stay Connected

3,390FansLike
162FollowersFollow
2,460SubscribersSubscribe
- Advertisement -spot_img

Latest Articles