ఎవ్వడు వాడు

June 21, 2021

589

నిర్గుణుండు విశ్వమెటుల సృజియించె

నిరాకారు రూపమెటుల బంధించే

నిరంజను స్తోత్ర మెటుల స్పృశియించే

ఉన్నను లేడనుపించువాడు

లేనట్లు తోచి ఉన్నవాడు

పిలచినను పిలువకున్నను నిశ్శబ్దమున పలుకువాడు,

మాధవుడొ, ఉమాధవుడొ,

వేరొకడో, నాయందు నిలిచి యున్నాడు

కొలుచుదు వాని నేను విశ్వంభరునిగా

గురునిగా, గూఢ విభుఁనిగా, వేరొండు చోట వెదుకగానేల?

కనిపించడు, ఊహలకు అందడు, చేష్టలకు లొంగడు,

హృదయపల్లవిని వినిపించుకోడు,

జ్ఞాన పల్లమెరిగి ప్రవహించడు,

వినతులు విని తలయూపడు,

కష్టమెఱిగి కనుబొమ్మలైన కదపడు,

కఠినాత్ముడు, కపటి, ఎటుల వేగుదు వీనితోడ,

కానిలే, ఎందు పోగలడు,

భక్తి తమకమ్మున దక్కకపోడు.