Monday, November 28, 2022

గొడుగు

అంత పెద్ద ఆకాశాన్నీ

ఇంత గుడ్డ పేలిక ధిక్కరించింది.

భుజం మీద

విష్ణు చక్రంలా తిరుగుతుంటే

మేఘాలు గుబగుబలాడాయి

ధైర్యమంటే గొడుగుదే.

మూడు రోజులుగా

ఒకటే వర్షం!

కిటికీల్లోంచి తిలకించే వారికి

బర్‌ఖా బహారే

గరీబోళ్లకు మాత్రం

రాజ్ కపూర్, నర్గీస్ శ్రీ 420లో

ఆమె పాల కోసం బయల్దేరింది

తన హృదయ స్పందనలు

గొడుగు పుల్లపుల్లకూ తెలుస్తున్నాయి.

భళ్లున తెరుచుకున్నప్పుడు

రెప్పల్లా ముడుచు కున్నప్పుడూ

దృశ్యాదృశ్యాల జలక్రీడ.

గొడుగు అంచున జారే

వాన నీళ్లనూ కన్నీళ్లనూ

వేరు చెయ్యడం కష్టం!

మామూలు రోజుల్లో గొడుగు

అందమైన పూల డిజైన్లతో

ఓ కావ్య ఖండికలా వుంటుంది.

లోపలి పుల్లల అల్లిక

సంవిధాన శిల్పంలా

ముచ్చట గొలిపే

అల్లి బిల్లి వాటిక.

ఈనాటి ఫ్యాన్సీ గొడుగులు సరే

నాకు వారసత్వంగా వచ్చిన

ఛత్రిని బయటికి తీశాను.

ఆనాటి మాసికలు

నల్లని ఆకాశంలో

స్మృతి తారకల్లా మెరుస్తున్నాయి.

పాత వస్తువులను పారేసే సంస్కృతి

నాకిప్పటికీ అబ్బ లేదు.

ఈ గొడుగు నీడలో జాగా

ఇద్దరికీ వుంటుంది

శ్రీ 420 సినిమాలో

నర్గీస్ రాజ్ కపూర్‌లు

మెరిన్‌డ్రైవ్‌పై పాడే దృశ్యం

యాభై యేళ్లు దాటినా

తడి తడి గానే వుంది.

ముసురులో తడవట మెందుకు

మార్నింగ్ వాక్ మానెయ్అంది మా ఆవిడ

గొడుగు చేతిలో వుంటే

అడుగులకు అదో ధైర్యం.

గొడుగు నడిచే చెట్టులాంటిది

దాని నీడ రక్షణకు తొలిమెట్టు.

Also read: మా ఊరు

Also read: ఆకు

Also read: తాళం చెవి

Also read: సాక్షి

Also read: దస్తి

Dr N.Gopi
ప్రముఖ కవి, తెలుగు విశ్వవిద్యాలయం మాజీ కులపతి

Related Articles

LEAVE A REPLY

Please enter your comment!
Please enter your name here

Stay Connected

3,390FansLike
162FollowersFollow
2,460SubscribersSubscribe
- Advertisement -

Latest Articles