Thursday, December 8, 2022

నేను చెప్పని కతలు

నీ కెన్ని కథలు చెప్పానో కదా మిత్రమా!

చిలిపివి, గిలిగింతలు పెట్టేవి, హాయిగా నవ్వుకొనేవి

సరదాసరదా వృతాంతాలు;

అనవద్యమైన, నిర్వివాదమైన, తేలికపాటి పిట్ట కథలు,

విచిత్ర విశేషాలు, సాదాసీదా చమత్కారాలు,

హస్యాలు, వెటకారాలు…

అప్పుడప్పుడు, స్వంత డప్పు కొట్టుకోడానికి,

Modesty చూపుకోడానికి

 చేసిన చిన్న చిన్న తప్పులను

నవ్వులాటల్లా వర్ణించిన ఉదంతాలు!

నేనంతవరకె చెప్పా…నీ కంతవరకె తెలుసు!

 నేనుచేసిన క్షమించరాని పాపాలు,

అనుభవించిన చెప్పుకోలేని అవమానాలు,

 సిగ్గుతో తలవంచుకొన్న క్షణాలు,

భయంతో, బాధతో, నోరు మూగబోయిన వేళలు

… నా పగుళ్లువారిన గుండెలోతుల్లోనే,

పదిలంగా దాచుకున్నాను సుమా!

క్షమించు మిత్రమా, క్షమించు…

తప్పనిసరిగా కప్పిఉంచిన అనేకానేక

అశ్లీల తప్పిదాలను, వింత వింత వికారాలను…

నీకు మనసువిప్పి చెప్పనందుకు.

నేను మనిషినే గా…కపటం, కుళ్లు,

మొహమాటం, దాపరికం, అహంకారం,

స్తోత్కర్ష, పరనింద, నిర్లక్ష్యం వగైరా

అన్నీ సామాన్యమే, అందరికి లాగానే!

ఎంత బరువులైన, అవి అన్నీ మోస్తూనే ఉన్నాను

… దింపలేని భారాలు, వదిలించుకోలేని ఉరుగులు,

తళతళ లాడే మోహపు మురుగులు…

ఆ బరువుకు, నా అడుగులు తడబడుతూనే ఉన్నాయి,

నా నడక నెమ్మదిస్తూనే ఉంది…

కానీ ఇక్కడ కాదు

…అక్కడ,

నా నిగూఢమైన వెన్నెముకను

మొట్ట మొదటిసారి

గట్టిగా నిటారుగా చేసి,

వాసనారాహితంగా, నగ్నంగా, నిస్సిగ్గుగా,

నా అనిర్వచనీయ విచారాలు

వివాదాస్పద వాదాలు, వివరించలేని వేదనలు

 ఆయన పాదాల వద్ద కుప్పగా పోసి

నిరామయంగా నిలుచుని నిరీక్షిస్తాను!

నాకు తెలుసు, నా తప్పిదాలు లెక్కవేసి

ఆయన నవ్వడు, కోపపడడు, ఏవగించుకోడు

…ఏ భావము చూపించడు!

నిర్వికారంగా, నిర్లిప్తంగా, నిరంకుశంగా…

కేవలం ఒక్క మాటలో

తన తిరుగులేని తీర్పు వినిపిస్తాడు.

Also read: నా ఇష్టాయిష్టాలు

Also read: మా రైతు

Also read: కొందరు అంతే

Also read: రాజకీయం

Also read: ద్వంద్వాలు

MAHATHI
మైదవోలు వేంకటశేష సత్యనారాయణ కలం పేరు మహతి. ఆయన ఇంగ్లీషులో ప్రఖ్యాతిగాంచిన కవి. భారతీయ ఇతిహాసాన్నీ, పురాణాలనూ తన సుదీర్ఘమైన గేయాల ద్వారా ప్రపంచంలో, ముఖ్యంగా పాశ్చాత్య దేశాలలో ప్రచారం చేసే మహాప్రయత్నంలో ఉన్నారు. ఛందోబద్ధంగా ప్రాచీన శైలిలో గేయాలు రాయడానికి ఇష్టపడతారు. స్వేచ్ఛాగీతాల రచనకు విముఖులేమీ కాదు. ‘ఫైండింగ్ ద మదర్ (శ్రీ సుందరకాండ),’ ‘హరే కృష్ణ,’ ‘ఓషన్ బ్లూస్,’ ‘ద గాంజెస్ అండ్ అదర్ పోయెమ్స్’ వంటి గ్రంథాలు ఆయనకు గొప్ప పేరుప్రఖ్యాతులు తెచ్చిపెట్టాయి. జాతీయ, అంతర్జాతీయ పత్రికలలో ఆయన రచనలు అనేకం ప్రచురితమైనాయి. కవి ఫొన్ నంబర్ +91 83093 76172

Related Articles

LEAVE A REPLY

Please enter your comment!
Please enter your name here

Stay Connected

3,390FansLike
162FollowersFollow
2,460SubscribersSubscribe
- Advertisement -

Latest Articles