Sunday, June 26, 2022

గొర్రె

ఆ గొర్రె హాయిగానే ఉంది

రత్తయ్య నీడలో

రోజుకో కొత్త కల కంటూ.

తన అమ్మను, నాన్నను,

అక్క చెల్లెళ్లను, అన్నదమ్ములను

రత్తయ్య ఎక్కడికో పంపాడు…

మంచిచోటికే అయ్యుంటుంది…

చల్లని గాలి, పరచుకొన్న పచ్చిక బయళ్ళు,

నిగ నిగ లాడే నిర్మల మైన

నీటితో ప్రవహించే సెలయేళ్ళు…

అక్కడికే, అక్కడికే…

నన్నూ ఒకరోజు పంపుతాడు…

ఎప్పుడో?

అతనిచేతిలో అద్దంలా

మిలమిల లాడే వెడల్పాటి కత్తి,

దానిలోకి చూస్తుంది

తనవాళ్లేమయినా కనపడుతారేమొనని!

అవును…అదే కదా తనలాంటి వాళ్ళందరిని

దూర తీరాలకు చేర్చే మాయా దర్పణం…

తన ముఖం మాత్రం కనిపిస్తుంది…

నేనెప్పుడు వెళతానూ…

అతన్ని చూస్తూ మూగగా మూలుగు తుంది.

……………

రోడ్డు ప్రక్కన పెద్ద హోర్డింగులో

అతను రెండు వేళ్ళు V లా చూపుతూ

వెకిలి నవ్వు నవ్వుతున్నాడు.

ఖద్దరు లాల్చీ, టోపీ…

వెనుక ఏదో గుర్తు…

రత్తయ్య అతని ఫోటోనే చూస్తూ

తనలో తాను గొణుగుకొన్నాడు…

“అన్నా, నా ఓటు నీకే నన్నా…

నువ్వు గెలవాలి, మా కష్టాలు తీరాలి!”

……

ఆరోజు పొద్దున్నే

గొర్రె తల తెగి క్రింద పడింది.

మధ్యాహ్నం రత్తయ్య

పోలింగ్ బూత్ లో ఓటు వేసాడు.

Also read: యుద్ధము… శాంతి

Also read: ఎరుపు-తెలుపు

Also read: వర్షం

Also read: అమ్మ

Also read: నూతన జీవితం

MAHATHI
మైదవోలు వేంకటశేష సత్యనారాయణ కలం పేరు మహతి. ఆయన ఇంగ్లీషులో ప్రఖ్యాతిగాంచిన కవి. భారతీయ ఇతిహాసాన్నీ, పురాణాలనూ తన సుదీర్ఘమైన గేయాల ద్వారా ప్రపంచంలో, ముఖ్యంగా పాశ్చాత్య దేశాలలో ప్రచారం చేసే మహాప్రయత్నంలో ఉన్నారు. ఛందోబద్ధంగా ప్రాచీన శైలిలో గేయాలు రాయడానికి ఇష్టపడతారు. స్వేచ్ఛాగీతాల రచనకు విముఖులేమీ కాదు. ‘ఫైండింగ్ ద మదర్ (శ్రీ సుందరకాండ),’ ‘హరే కృష్ణ,’ ‘ఓషన్ బ్లూస్,’ ‘ద గాంజెస్ అండ్ అదర్ పోయెమ్స్’ వంటి గ్రంథాలు ఆయనకు గొప్ప పేరుప్రఖ్యాతులు తెచ్చిపెట్టాయి. జాతీయ, అంతర్జాతీయ పత్రికలలో ఆయన రచనలు అనేకం ప్రచురితమైనాయి. కవి ఫొన్ నంబర్ +91 83093 76172

Related Articles

LEAVE A REPLY

Please enter your comment!
Please enter your name here

Stay Connected

3,390FansLike
162FollowersFollow
2,460SubscribersSubscribe
- Advertisement -

Latest Articles