Saturday, October 16, 2021

ఫ్లెమింగో-9

తరలి వచ్చిన బంజార పక్షులు

కువకువల గీతికలని ఆలపిస్తాయి

గుండెల్లో దాచుకున్న ప్రేమనిధుల్ని

గుదిగూట్లో ఆరాబోస్తాయి

ప్రణయ కలాప లాటీల ఘోషకు

చుక్కలన్నీ నేలకు తొంగి చూస్తాయి

తరుణ హృదయకేళీ విలాసాలు

యామిని ఏకాంతంలో కోరిక లూదుతాయి

ఉదయం దినబాలుడు కిరణకరాలు చాచి

గోరింట పూసుకుంటాడు గుంభనంగా

హృదయకవాటాలు తెరిచి కుసుమాలు

రంగులద్దుకుంటాయి నిర్మలంగా

వర్ణం ప్రాణ పల్లవ మహిత స్వరూపం

మొన్నటి వరకూ ఎవరూ పలకరించని

అనామిక నేలపట్టు

నేడు ఖగసమాగమానికి ఆయువుపట్టు

నిన్నటి దాకా వెలవెల బోయిన వృక్షాలు

నేడు తీగలు మీటిన వీణియలు

వేయి వేణువుల కృష్ణగీతికలు..

ఇప్పుడు నేలపట్టు ఉదయాలు

స్వరమకరంద తరంగ ఝరులు

ఇప్పుడు నేలపట్టు సాయంత్రాలు

అనురాగ గీతామృత స్రవంతులు

ఒక ఫెలికాన్ రెక్కల గుడారంలో

ప్రియరాల్ని పొదువుకుంటుందిక్కడ

ఎర్ర కాళ్ల కొంగ ఒకటి పక్కన చేరి

పొడువు ముక్కుతో సఖి నలరిస్తుందిక్కడ

శబరి కొంగ శృంగార రాగంలో

ప్రేయసి ప్రియగానంలో మైమరుస్తుంది

వళ్లంతా ఊపిరి చేసి వడ్లపిట్ట

చెలియ మేనంతా స్పృశిస్తుంది

క్షీరదాల ప్రేమ వరదలే కాదు

అండజాల అనురాగాలూ ప్రవహిస్తాయి

సంతాన లక్ష్మి మహాయజ్ఞంలో

కోటిప్రాణాలు ఉదయిస్తాయి..!!

Also read: ఫ్లెమింగో-1

Also read: ఫ్లెమింగో-2

Also read: ఫ్లెమింగో-3

Also read: ఫ్లెమింగో-4

Also read: ఫ్లెమింగో-5

Also read: ఫ్లెమింగో – 6

Also read: ఫ్లెమింగో-7

AAlso read: ఫ్లెమింగో-8

Perugu Ramakrishna
కవి పరిచయం..! 1975 లో 10 వ తరగతిలోనే తొలికవిత రాసి కవిత్వ యాత్ర మొదలెట్టిన కవి. కవిత్వమే ఊపిరిగా జాతీయ , అంతర్జాతీయ కవిగా ఎదిగిన సుపరిచితులు. వెన్నెల జలపాతం(1996) , ఫ్లెమింగో (దీర్ఘ కవిత2006), నువ్వెళ్ళిపోయాక (దీర్ఘకవిత2003), ముంజలు (మినీకవితలు2007) పూలమ్మిన ఊరు (2012) ఒకపరిమళభరిత కాంతి దీపం(2017), దూదిపింజల వాన (2020) మరియు మొత్తం 26 ప్రచురితాలు ..అంతేగాక సుమారు 200 అంతర్జాతీయ సంకలనాల్లో తన ఆంగ్ల అనువాద కవితలు నమోదు చేసుకున్న అరుదైన భారతీయ తెలుగు ప్రాంత కవి. 15 దేశాలు కవిత్వం కోసం పర్యటించి పలు విశ్వ వేదికలపై తెలుగు కవితా వాణి బలంగా వినిపించిన విశేష కవి. రంజని -కుందుర్తి ప్రధాన అవార్డ్ , ఎక్స్ రే ప్రధాన అవార్డ్ లతో మొదలెట్టి సుమారు 100 విశిష్ట అవార్డ్ లు ,2008 లో ఉమ్మడి ఆంధ్రప్రదేశ్ ముఖ్య మంత్రి డా వై యస్సార్ ద్వారా రాష్ట్ర ఉగాది విశిష్ట పురస్కారం, గ్రీస్ , జపాన్, మలేషియా, కెనడా, అమెరికా, చెక్ రిపబ్లిక్ , ఘనా, సింగపూర్, లాంటి ఎన్నో దేశాల పురస్కారాలు , తాజాగా 2019 భారత స్వాతంత్ర్య దినం సందర్భంగా గుజరాత్ సాహిత్య అకాడెమీ పురస్కారం ..లాంటి ఎన్నో ప్రతిష్టాత్మక గౌరవాలు పొందారు. చెక్ రిపబ్లిక్ (2016) మెక్సికో (2019) లనుండి రెండు గౌరవ డి లిట్ లు అందుకున్నారు. వీరి రెండు కవితా సంపుటుల మీద రెండు విశ్వ విద్యాలయాలు ఎం.ఫిల్ డిగ్రీలు ప్రదానం చేయగా , మద్రాసు విశ్వ విద్యాలయంలో మొత్తం కవిత్వ గ్రంధాల పై పి హెచ్ డి పరిశోధన జరుగుతుంది. వీరి కవిత్వం పలు భారతీయ భాషల్లోకి స్పానిష్, ఫ్రెంచి, జపాన్, గ్రీస్, అల్బేనియా, రుమేనియా, అరబ్ లాంటి ప్రపంచ భాషల్లోకి అనువాదమై ప్రచురణ పొందింది.

Related Articles

LEAVE A REPLY

Please enter your comment!
Please enter your name here

Stay Connected

3,390FansLike
162FollowersFollow
2,460SubscribersSubscribe
- Advertisement -

Latest Articles