Monday, November 28, 2022

ఇనుపచెట్లు

మా యింటి పెరటిచెట్టు ఉదయం

పాట మానేసి చాల రోజులైంది

ఆ పాట మా యింటిల్లిపాదికి శుభోదయం

మా యింటికే కాదు,

మా వీధి మొత్తానికీ సుప్రభాతగీతం

రంగులు పూచే ఆకాశానికి 

ప్రకృతి ప్రసాదించే మేలుకొలుపు సింఫనీ…

మూగబోయిన చెట్టుని పలుకరిద్దామని

కొమ్మల్ని చేతుల్లో పొదువుకుంటే

ఆకుల కళ్ళతో ఆకాశాన్ని చూపింది

శూన్యం నిండా ఇనుపచెట్ల దర్శనం

సాలెగూడులా నగరానికి అల్లుకున్న టవర్ల పైన

క్రూరపు గద్దల కాపురం

మా చెట్టు కొమ్మల్లోని ఖాళీ గూళ్ళలో

ఒక్క పిచ్చుకయినా కనిపించలేదు

పిచ్చుకలు కిచకిచల సంగీతాన్ని సృష్టిస్తేనే కదా

చెట్లకి రోజూ పండుగ

గోడమీది అద్దానికి ఆనందం

ఇల్లంతా శబ్ద నృత్య వాతావరణం

ఇనుపచెట్లు తరిమేసిన పిచ్చుకల పరస

ఏ నిరాశాఎడారుల్లో మాయమైపోయిందో

ఏ రాబందుల అగ్ని సృష్టి భుగభుగల్లో

భస్మీపటలమై జ్ఞాపకంగా మిగిలిపోయిందో

గోడమీద పిచ్చుక బొమ్మొకటి

నోరు తెరచి నన్ను ప్రశ్నిస్తున్నట్టు..

మానవజాతి అభివృద్ది కోసం

జీవవైవిధ్యాన్ని నాశనం చేస్తున్న విధ్వంసకారుడిలా

ఆ బొమ్మ ముందు మోకరిల్లిన నేరస్తుణ్ణి నేను…!!

(కవి మొబైల్: 9849230443)

Perugu Ramakrishna
కవి పరిచయం..! 1975 లో 10 వ తరగతిలోనే తొలికవిత రాసి కవిత్వ యాత్ర మొదలెట్టిన కవి. కవిత్వమే ఊపిరిగా జాతీయ , అంతర్జాతీయ కవిగా ఎదిగిన సుపరిచితులు. వెన్నెల జలపాతం(1996) , ఫ్లెమింగో (దీర్ఘ కవిత2006), నువ్వెళ్ళిపోయాక (దీర్ఘకవిత2003), ముంజలు (మినీకవితలు2007) పూలమ్మిన ఊరు (2012) ఒకపరిమళభరిత కాంతి దీపం(2017), దూదిపింజల వాన (2020) మరియు మొత్తం 26 ప్రచురితాలు ..అంతేగాక సుమారు 200 అంతర్జాతీయ సంకలనాల్లో తన ఆంగ్ల అనువాద కవితలు నమోదు చేసుకున్న అరుదైన భారతీయ తెలుగు ప్రాంత కవి. 15 దేశాలు కవిత్వం కోసం పర్యటించి పలు విశ్వ వేదికలపై తెలుగు కవితా వాణి బలంగా వినిపించిన విశేష కవి. రంజని -కుందుర్తి ప్రధాన అవార్డ్ , ఎక్స్ రే ప్రధాన అవార్డ్ లతో మొదలెట్టి సుమారు 100 విశిష్ట అవార్డ్ లు ,2008 లో ఉమ్మడి ఆంధ్రప్రదేశ్ ముఖ్య మంత్రి డా వై యస్సార్ ద్వారా రాష్ట్ర ఉగాది విశిష్ట పురస్కారం, గ్రీస్ , జపాన్, మలేషియా, కెనడా, అమెరికా, చెక్ రిపబ్లిక్ , ఘనా, సింగపూర్, లాంటి ఎన్నో దేశాల పురస్కారాలు , తాజాగా 2019 భారత స్వాతంత్ర్య దినం సందర్భంగా గుజరాత్ సాహిత్య అకాడెమీ పురస్కారం ..లాంటి ఎన్నో ప్రతిష్టాత్మక గౌరవాలు పొందారు. చెక్ రిపబ్లిక్ (2016) మెక్సికో (2019) లనుండి రెండు గౌరవ డి లిట్ లు అందుకున్నారు. వీరి రెండు కవితా సంపుటుల మీద రెండు విశ్వ విద్యాలయాలు ఎం.ఫిల్ డిగ్రీలు ప్రదానం చేయగా , మద్రాసు విశ్వ విద్యాలయంలో మొత్తం కవిత్వ గ్రంధాల పై పి హెచ్ డి పరిశోధన జరుగుతుంది. వీరి కవిత్వం పలు భారతీయ భాషల్లోకి స్పానిష్, ఫ్రెంచి, జపాన్, గ్రీస్, అల్బేనియా, రుమేనియా, అరబ్ లాంటి ప్రపంచ భాషల్లోకి అనువాదమై ప్రచురణ పొందింది.

Related Articles

LEAVE A REPLY

Please enter your comment!
Please enter your name here

Stay Connected

3,390FansLike
162FollowersFollow
2,460SubscribersSubscribe
- Advertisement -

Latest Articles