Sunday, June 20, 2021

ఫ్లెమింగో – 6

కాలం రెక్కలపై కదిలిన ఫెలికాన్లు

గాలి కారులో దూసుకొచ్చిన ఫ్లెమింగోలు

పతంగులై ఎగిరొచ్చిన ఎర్రకాళ్ళ కొంగలు

రెపరెపలాడుతూ ఎగిరిన కొంకణాయి

కెరటాల తెరచాపల పైన నల్ల కొంగలు

దేశదేశాల ప్రేమ రాయబారులందరూ

అంతర్జాతీయ సదస్సులో పాల్గొన్నట్టు

నేలపట్టు ప్రకృతంతా రంగుల ప్రేమ సందేశాలు

పక్షి పర్యాటకుల అనురాగోత్సవాలన్నీ

ఆనందంగా జరుపుకుంటుంది జవానీ

నేలపట్టు కొమ్మల నిండా ఆనందరామాలు

ఏ కుప్పాల్లో చూపుదారి తప్పినా

కదిలే రంగుల కలల హంగామాలే

మన్మధ సామ్రాజ్యాల సరంజామాలే

మిధున రాశి ప్రయోగ రహస్యాలే

ఎగిరే వర్ణ నావల శతక ప్రవల్హికలే..

పులికాట్ సరస్సంతా కావ్యనాయకుల సమ్మేళనం

పులికాట్ ఆకాశమంతా భావ వీచికల ప్రభంజనం

ఒక్కో పక్షి ఎగిరేసిన ఒక్కో కవితా పతాక

రంగుల రామ చిలుక కలల ఖండ కావ్యం

చీకటి అడుసు తొక్కిన నల్ల కాళ్ళ కొంగ

నీలి పులికాట్ లో కాలు కడుగుతుంది

రంగురంగుల సముద్రపు రామచిలుక

గిలకబాయి చేదలా నీళ్ళలో జారుతుంది

ఒంటరిగా ఒక మహాతపస్వి

ఒంటికాలు తపస్సు చేస్తుంటాడు

నీటి ఛాయలో నారాయణి ప్రత్యక్షమయితే

గుటకాయ స్వాహా మంత్రం జపిస్తాడు

కాలం పక్కలకు రెక్కలు జోడించి

గూడస్వామి మూడు

మునకలేస్తాడు పులితీర్ధంలో

వేలమంది నారీమణులు

భారతీయ సంప్రదాయ నృత్యభంగిమల్లో

నిశ్చల చిత్రమైనట్లు

జలవేదికపై అనుకరిస్తున్న

వేల ఫ్లెమింగోల భంగిమలు

నవనవలాడే నవలామణుల కోసం

జలనిధికై నిత్యం నాచికోలు సమరం

నేలపట్టు నాగస్వరం ఊదినట్లు

చీటికి మాటికి గూటి పయనం

అల్లరి పిల్లలే అలలై

తేలాడే రెక్కల పడవలు

ప్రళయకావేరి జలమైదానాన్ని

ప్రణయ సావేరి

రాగ కచ్చేరి చేసిన శిల్పం

జలతరంగిణి ప్రసన్న జుగల్బందీలో

జలతారు రాగాల పరాగ వర్షం

తెల్లవారితే చాలు పులికాటంతా

రంగురంగుల తివాచీ పరుచుకొని

వసంత హేమంత హేలల్ని అల్లుకొని

ఎగిరే పూలతోటై ప్రవహిస్తుంది

ఎదురు చూసే సముద్రుని నోట నీరూరుస్తుంది..!

Also read: ఫ్లెమింగో-1

Also read: ఫ్లెమింగో-2

Also read: ఫ్లెమింగో-3

Also read: ఫ్లెమింగో-4

Also read: ఫ్లెమింగో-5

Perugu Ramakrishna
కవి పరిచయం..! 1975 లో 10 వ తరగతిలోనే తొలికవిత రాసి కవిత్వ యాత్ర మొదలెట్టిన కవి. కవిత్వమే ఊపిరిగా జాతీయ , అంతర్జాతీయ కవిగా ఎదిగిన సుపరిచితులు. వెన్నెల జలపాతం(1996) , ఫ్లెమింగో (దీర్ఘ కవిత2006), నువ్వెళ్ళిపోయాక (దీర్ఘకవిత2003), ముంజలు (మినీకవితలు2007) పూలమ్మిన ఊరు (2012) ఒకపరిమళభరిత కాంతి దీపం(2017), దూదిపింజల వాన (2020) మరియు మొత్తం 26 ప్రచురితాలు ..అంతేగాక సుమారు 200 అంతర్జాతీయ సంకలనాల్లో తన ఆంగ్ల అనువాద కవితలు నమోదు చేసుకున్న అరుదైన భారతీయ తెలుగు ప్రాంత కవి. 15 దేశాలు కవిత్వం కోసం పర్యటించి పలు విశ్వ వేదికలపై తెలుగు కవితా వాణి బలంగా వినిపించిన విశేష కవి. రంజని -కుందుర్తి ప్రధాన అవార్డ్ , ఎక్స్ రే ప్రధాన అవార్డ్ లతో మొదలెట్టి సుమారు 100 విశిష్ట అవార్డ్ లు ,2008 లో ఉమ్మడి ఆంధ్రప్రదేశ్ ముఖ్య మంత్రి డా వై యస్సార్ ద్వారా రాష్ట్ర ఉగాది విశిష్ట పురస్కారం, గ్రీస్ , జపాన్, మలేషియా, కెనడా, అమెరికా, చెక్ రిపబ్లిక్ , ఘనా, సింగపూర్, లాంటి ఎన్నో దేశాల పురస్కారాలు , తాజాగా 2019 భారత స్వాతంత్ర్య దినం సందర్భంగా గుజరాత్ సాహిత్య అకాడెమీ పురస్కారం ..లాంటి ఎన్నో ప్రతిష్టాత్మక గౌరవాలు పొందారు. చెక్ రిపబ్లిక్ (2016) మెక్సికో (2019) లనుండి రెండు గౌరవ డి లిట్ లు అందుకున్నారు. వీరి రెండు కవితా సంపుటుల మీద రెండు విశ్వ విద్యాలయాలు ఎం.ఫిల్ డిగ్రీలు ప్రదానం చేయగా , మద్రాసు విశ్వ విద్యాలయంలో మొత్తం కవిత్వ గ్రంధాల పై పి హెచ్ డి పరిశోధన జరుగుతుంది. వీరి కవిత్వం పలు భారతీయ భాషల్లోకి స్పానిష్, ఫ్రెంచి, జపాన్, గ్రీస్, అల్బేనియా, రుమేనియా, అరబ్ లాంటి ప్రపంచ భాషల్లోకి అనువాదమై ప్రచురణ పొందింది.

Related Articles

LEAVE A REPLY

Please enter your comment!
Please enter your name here

Stay Connected

3,390FansLike
162FollowersFollow
2,460SubscribersSubscribe
- Advertisement -

Latest Articles