Saturday, October 16, 2021

ఫ్లెమింగో-11

కాలం ఎప్పుడూ తెరిచిన పుస్తకం

అన్నీ తనలో యిమిడిన బహిరంగ రహస్యాలే

ఎవరికీ ఏమీ నేర్పని గురువు కాలం

అందరికీ అన్నీ తెలిపే రాయబారి కాలం

జీవన యాగ జ్ఞానులు విదేశీ పక్షులు

సీమాంతర ద్వేషాలెరుగని ఆత్మీయ మిత్రులు

ఇంద్రియ చాపల్యం లేని విదేశీయోగులు

కాలచక్ర రహస్యం దర్శించిన దివ్య జ్ఞానులు

విశ్వభాషలో పలకరింపులు, పులకరింపులు

సమైక్యతా శిబిరాలు నిర్వహించే సంస్కారులు

ఈ నేల గాలి సోకగానే వలస బిడారుకి

ఆత్మతీర్థాలు పొంగి పొరలు తుంటాయి

ఈ గుబురు కొమ్మల పచ్చని నీడలోనే

రేపటి తరం కలలన్నీ సాక్షాత్కారిస్తాయి

అందుకే పక్షి కాలానికి సాంకేతమంటాను

భూత భవిష్యధ్వర్తమానాల సంగమగీతమంటాను

త్రికాల తంత్రానికి సాధికారతే సంగమ హోమం..

పక్షి పక్షిని ప్రేమిస్తుంది

ఆత్మ ఆత్మ తో సంగమిస్తుంది

నేలపట్టు పౌండరీక దీక్షా వేదిక

నేలపట్టు సనాతన యాగ సూచిక

పరంపరాగత  బీజాల ప్రాణప్రతిష్ట

ప్రకృతి సమతౌల్యానికి త్రాసు ఇక్కడ

ఇక్కడే ప్రకృతి మరో శ్వాస పీలుస్తుంది

ఇక్కడే జగతి ఒక సృష్టికి జన్మనిస్తుంది

సముద్రాలు దాటిన ఈ జానెడు నేల

ఒక జాతి జీవితానికే మనుగడ

ఒక బౌద్ధిక ధర్మం పరిఢవిల్లిన

ప్రాపంచిక సుఖదుఃఖాల తలగడ

మర్మరాగమో, రాగమార్మమో ఎరిగిన

రతీదేవి నృత్య ప్రాంగణమిది

అనిత్యమైన శరీరం తప్పనిసరై

ఆత్మ సార్థకతను కోరే తరుణమిది

దైహికానందమో, ఆనంద దైహికమో మరచి

మన్మధుడు ఉన్మత్తయోగి అవుతాడిక్కడ..

ప్రకృతే ఈ నేలపై ప్రకృతి ధర్మం నెరవేరుస్తుంది

పురుషుడై సృష్టి ధర్మం సాగిస్తుంది

ఆత్మ భేదం లేని పక్షి సమూహం

స్త్రీ పురుష వివక్షలేని సమానత్వం

కళ్ళు తెరిచిన వారికి వాంఛావాసన

కళ్ళు మూసిన ముముక్షులకి

ఆత్మ సాక్షాత్కారం

రుతువులై రంగులు మారే కాలం

పక్షులై పరవశిస్తుంది నిమేషం

ఇక్కడే ఒక అనాదికాలానికి

అంతం ఆరంభమౌతుంది

అంతం నుంచి అనంతానికి

ఇక్కడి నుంచే పునాది పడుతుంది..!!

Also read: ఫ్లెమింగో-10

Also read: ఫ్లెమింగో-9

Also read: ఫ్లెమింగో-8

Also read: ఫ్లెమింగో-7

Also read: ఫ్లెమింగో – 6

Perugu Ramakrishna
కవి పరిచయం..! 1975 లో 10 వ తరగతిలోనే తొలికవిత రాసి కవిత్వ యాత్ర మొదలెట్టిన కవి. కవిత్వమే ఊపిరిగా జాతీయ , అంతర్జాతీయ కవిగా ఎదిగిన సుపరిచితులు. వెన్నెల జలపాతం(1996) , ఫ్లెమింగో (దీర్ఘ కవిత2006), నువ్వెళ్ళిపోయాక (దీర్ఘకవిత2003), ముంజలు (మినీకవితలు2007) పూలమ్మిన ఊరు (2012) ఒకపరిమళభరిత కాంతి దీపం(2017), దూదిపింజల వాన (2020) మరియు మొత్తం 26 ప్రచురితాలు ..అంతేగాక సుమారు 200 అంతర్జాతీయ సంకలనాల్లో తన ఆంగ్ల అనువాద కవితలు నమోదు చేసుకున్న అరుదైన భారతీయ తెలుగు ప్రాంత కవి. 15 దేశాలు కవిత్వం కోసం పర్యటించి పలు విశ్వ వేదికలపై తెలుగు కవితా వాణి బలంగా వినిపించిన విశేష కవి. రంజని -కుందుర్తి ప్రధాన అవార్డ్ , ఎక్స్ రే ప్రధాన అవార్డ్ లతో మొదలెట్టి సుమారు 100 విశిష్ట అవార్డ్ లు ,2008 లో ఉమ్మడి ఆంధ్రప్రదేశ్ ముఖ్య మంత్రి డా వై యస్సార్ ద్వారా రాష్ట్ర ఉగాది విశిష్ట పురస్కారం, గ్రీస్ , జపాన్, మలేషియా, కెనడా, అమెరికా, చెక్ రిపబ్లిక్ , ఘనా, సింగపూర్, లాంటి ఎన్నో దేశాల పురస్కారాలు , తాజాగా 2019 భారత స్వాతంత్ర్య దినం సందర్భంగా గుజరాత్ సాహిత్య అకాడెమీ పురస్కారం ..లాంటి ఎన్నో ప్రతిష్టాత్మక గౌరవాలు పొందారు. చెక్ రిపబ్లిక్ (2016) మెక్సికో (2019) లనుండి రెండు గౌరవ డి లిట్ లు అందుకున్నారు. వీరి రెండు కవితా సంపుటుల మీద రెండు విశ్వ విద్యాలయాలు ఎం.ఫిల్ డిగ్రీలు ప్రదానం చేయగా , మద్రాసు విశ్వ విద్యాలయంలో మొత్తం కవిత్వ గ్రంధాల పై పి హెచ్ డి పరిశోధన జరుగుతుంది. వీరి కవిత్వం పలు భారతీయ భాషల్లోకి స్పానిష్, ఫ్రెంచి, జపాన్, గ్రీస్, అల్బేనియా, రుమేనియా, అరబ్ లాంటి ప్రపంచ భాషల్లోకి అనువాదమై ప్రచురణ పొందింది.

Related Articles

LEAVE A REPLY

Please enter your comment!
Please enter your name here

Stay Connected

3,390FansLike
162FollowersFollow
2,460SubscribersSubscribe
- Advertisement -

Latest Articles