Saturday, October 16, 2021

ఫ్లెమింగో-10

ఒక్క దేవకాకులే కాదు

పక్షులన్నీ పురాత్మా బంధువులే!

మనల్ని పలకరించను చేరవచ్చిన

మన్వంతరాల పురందరులే!

పిగిలిపిట్టని మనం పరదేశి అనుకుంటాం

శాంతి సంగాతిగా చూసిందెప్పుడు?

గుడ్డికొంగను దెయ్యం పక్కిగా భావిస్తాం

సౌజన్యరథసారథిగా లెక్కించిందెప్పుడు?

నల్ల చిలువ నల్లనిదే అయినా

నల్లన్నయ్యంత చల్లని గుండెల తండ్రి

ఎర్ర తీతువు అందాల చిందులన్నీ

సంసార పక్షమైన సుఖసామ్రాజ్య దీపావళులే

కొమ్మాకొమ్మా జీవన హోమంలో

పచ్చని చిరునవ్వుల ఆజ్యం పోస్తాయి

రెమ్మా రెమ్మా సంతాన జ్యోతి యాత్రలో

నవపల్లవ దీపాలు వెలిగిస్తాయి..

ఎన్ని ప్రబంధాలో, ఎన్ని ప్రణయాలో

ప్రతి కొమ్మా వాత్సాయన శిబిరం

ప్రతి గూడు ప్రణవోత్ధాన ముఖరం

సృష్టిలేదు, వృష్టిలేదు, వ్యష్టిలేదు

సంసార సుఖం వినా విశ్వ వృద్ధి లేదు

మనిషికి సంతానమే కాలబీజం

పక్షికి అండమే చైతన్య తేజం

విత్తు నుంచి చెట్టు, చెట్టు నుంచి విత్తు

విశ్వవ్యాప్తికి మొదటి మెట్టు

వలస పక్షుల సంతాన యజ్ఞానికి

యాగ వేదిక పరిఢవిల్లిన కడప చెట్టు

చెట్టు ప్రకృతి ఎగరేసిన పచ్చని జెండా

చెట్టే అలిసిన ప్రాణి కోటి అండ

సముద్రాలు దాటిన పరదేశి పక్షులకి

చెట్టే ప్రణయ సంగమాలయం

అనురాగం మరవని అండజతతికి

చెట్టే సృష్టిరహస్య దేవాలయం..!!

Also read: ఫ్లెమింగో-9

Also read: ఫ్లెమింగో-8

Also read: ఫ్లెమింగో-7

Also read: ఫ్లెమింగో – 6

Previous articleజీవితం
Next articleమోక్షం
Perugu Ramakrishna
కవి పరిచయం..! 1975 లో 10 వ తరగతిలోనే తొలికవిత రాసి కవిత్వ యాత్ర మొదలెట్టిన కవి. కవిత్వమే ఊపిరిగా జాతీయ , అంతర్జాతీయ కవిగా ఎదిగిన సుపరిచితులు. వెన్నెల జలపాతం(1996) , ఫ్లెమింగో (దీర్ఘ కవిత2006), నువ్వెళ్ళిపోయాక (దీర్ఘకవిత2003), ముంజలు (మినీకవితలు2007) పూలమ్మిన ఊరు (2012) ఒకపరిమళభరిత కాంతి దీపం(2017), దూదిపింజల వాన (2020) మరియు మొత్తం 26 ప్రచురితాలు ..అంతేగాక సుమారు 200 అంతర్జాతీయ సంకలనాల్లో తన ఆంగ్ల అనువాద కవితలు నమోదు చేసుకున్న అరుదైన భారతీయ తెలుగు ప్రాంత కవి. 15 దేశాలు కవిత్వం కోసం పర్యటించి పలు విశ్వ వేదికలపై తెలుగు కవితా వాణి బలంగా వినిపించిన విశేష కవి. రంజని -కుందుర్తి ప్రధాన అవార్డ్ , ఎక్స్ రే ప్రధాన అవార్డ్ లతో మొదలెట్టి సుమారు 100 విశిష్ట అవార్డ్ లు ,2008 లో ఉమ్మడి ఆంధ్రప్రదేశ్ ముఖ్య మంత్రి డా వై యస్సార్ ద్వారా రాష్ట్ర ఉగాది విశిష్ట పురస్కారం, గ్రీస్ , జపాన్, మలేషియా, కెనడా, అమెరికా, చెక్ రిపబ్లిక్ , ఘనా, సింగపూర్, లాంటి ఎన్నో దేశాల పురస్కారాలు , తాజాగా 2019 భారత స్వాతంత్ర్య దినం సందర్భంగా గుజరాత్ సాహిత్య అకాడెమీ పురస్కారం ..లాంటి ఎన్నో ప్రతిష్టాత్మక గౌరవాలు పొందారు. చెక్ రిపబ్లిక్ (2016) మెక్సికో (2019) లనుండి రెండు గౌరవ డి లిట్ లు అందుకున్నారు. వీరి రెండు కవితా సంపుటుల మీద రెండు విశ్వ విద్యాలయాలు ఎం.ఫిల్ డిగ్రీలు ప్రదానం చేయగా , మద్రాసు విశ్వ విద్యాలయంలో మొత్తం కవిత్వ గ్రంధాల పై పి హెచ్ డి పరిశోధన జరుగుతుంది. వీరి కవిత్వం పలు భారతీయ భాషల్లోకి స్పానిష్, ఫ్రెంచి, జపాన్, గ్రీస్, అల్బేనియా, రుమేనియా, అరబ్ లాంటి ప్రపంచ భాషల్లోకి అనువాదమై ప్రచురణ పొందింది.

Related Articles

LEAVE A REPLY

Please enter your comment!
Please enter your name here

Stay Connected

3,390FansLike
162FollowersFollow
2,460SubscribersSubscribe
- Advertisement -

Latest Articles