Monday, July 26, 2021

చవుడు భూమి

నాకు తెలుసు నేను దున్నుతున్నది

చవుడు భూమి అని.

ఇప్పుడు నయం. ఒకప్పుడు ఇది

 ప్రవహించే ఇసుక కెరటాల క్రింద

మెలికలు తిరుగుతూ నాగులు

ఎలుకలను వెతికిన ఎడారి నేల.

వేరే గతిలేక,  కేవలం జీవితేచ్చతో

 బ్రహ్మజముడు మొక్కలు

బ్రతకలేక బ్రతికీడ్చిన  మరుభూమి!

పచ్చటి పచ్చిక బయళ్ళనే

వరుణుడు వరిస్తా డెందుకో…

నదులు నగ్న సుందర వనాల సొగసులనే

స్పృశిస్తూ సాగుతాయెందుకో,

రేగడి నేలలోనే ఆరడుగుల లోతులో

జల వాహినులు ప్రవహిస్తాయి ఎందుకో?

మరి ఇక్కడో…

ఇక్కడి ఆకాశంలో  నల్ల మబ్బుల

జాడలు కనపడవు

దరిదాపు లో ఒయాసిస్ లు అగుపడవు.

 ఇసుక తుపానుల వికృత రోదన

వ్యగ్ర వంధ్య భూమి వ్యర్థ వేదన…

మధ్య మధ్యలో నిరీహ నిశ్శబ్దం

చేసే వేడి నిట్టూర్పులు! ఇంతే!

ప్రకృతి కి ఎంత పక్షపాతం?

భగవంతుడూ  బలవంతుడి పక్షమే!

అయినా కష్టపడ్డాను…

ఎండి పగుళ్లు వారిన నేలను కన్నీటితో తడిపాను

దాహార్తి తో దహించుకు పోతున్న నేల తల్లికి

స్వేదం అర్ఘ్యం గా ఇచ్చాను.

ఈవేళ కాక పోతే రేపు,

వరి రాకపోతే వేరు శనగ,

వేరేది పండక పోతే

సణుగుకుంటూ వేసే సరుగుడు…

ఆరు నెలలకు రాకపోతే ఆరేండ్లకు

నాకు, నా నేల తల్లికి గట్టి గుండెలు…

అవి చీల్చి అయినా

మధుర మధుర జీవ జల ఝరులలో

ఓ రోజు మునిగి తేలుతాం!

ఈ సంక్రాంతి కి కాకపోయినా

వచ్చే సంక్రమణకు

తీయ పొంగలి చేసి భూఆశ్రిత

భూత గణాలకు నైవేద్యం పెడతాం!

అంత వరకు కరగవు ఈ కండలు…

సడలదు మనో ధైర్యం…

బ్రతకడానికి అన్నం లేకపోతే

కంద మూలం!

Also read: పాత కథ

Also read: చరిత్ర

Also read: భాష్పాంజలి

Also read: చందమామ

Also read: పగటి కలలు

MAHATHI
మైదవోలు వేంకటశేష సత్యనారాయణ కలం పేరు మహతి. ఆయన ఇంగ్లీషులో ప్రఖ్యాతిగాంచిన కవి. భారతీయ ఇతిహాసాన్నీ, పురాణాలనూ తన సుదీర్ఘమైన గేయాల ద్వారా ప్రపంచంలో, ముఖ్యంగా పాశ్చాత్య దేశాలలో ప్రచారం చేసే మహాప్రయత్నంలో ఉన్నారు. ఛందోబద్ధంగా ప్రాచీన శైలిలో గేయాలు రాయడానికి ఇష్టపడతారు. స్వేచ్ఛాగీతాల రచనకు విముఖులేమీ కాదు. ‘ఫైండింగ్ ద మదర్ (శ్రీ సుందరకాండ),’ ‘హరే కృష్ణ,’ ‘ఓషన్ బ్లూస్,’ ‘ద గాంజెస్ అండ్ అదర్ పోయెమ్స్’ వంటి గ్రంథాలు ఆయనకు గొప్ప పేరుప్రఖ్యాతులు తెచ్చిపెట్టాయి. జాతీయ, అంతర్జాతీయ పత్రికలలో ఆయన రచనలు అనేకం ప్రచురితమైనాయి. కవి ఫొన్ నంబర్ +91 83093 76172

Related Articles

LEAVE A REPLY

Please enter your comment!
Please enter your name here

Stay Connected

3,390FansLike
162FollowersFollow
2,460SubscribersSubscribe
- Advertisement -

Latest Articles